யானடி வீழ்ந்தேன்!

யானடி வீழ்ந்தேன்!

(ஹி..ஹி..1962லே எழுதினது.)

பாலாவி என்னமெலி நூலாடை தரிக்கின்ற

      பாவை உனதடியேன்; எழிற்பார்வைக்கும் அடியேன்!

காலேஜு சென்றிடநீ காலெடுத்து வைக்கின்ற

      கவர்ன்மெண்ட்டு பஸ்ஸுக்கும் கண்டக்டர்க்கடியேன்!

சீரான பாதமலர் படுமுன்றன் எழிலான

      ஸ்லிப்பருக்கும் அடியேன்; ஷிஃபானுக்கடியேன்!

வாராமல் வாரிவிட்ட கூந்தலுக்கும் பூவிற்ற

      மலர்க்காரப் பாட்டிக்கும் பேரனுக்கும் அடியேன்!

தித்திக்கும் மாலா உன் பேர்சொல்லும் பிச்சம்மாத்

      தோழிக்கும் அடியேன்; அவள் தம்பிக்கும் அடியேன்!

கத்தியைப்போல் பிரம்புசுற்றிக் கனல்கக்கி வருகின்ற

      காலனுன்றன் அப்பாவின் கைத்தடிக்கும் அடியேன்!

இனியகரம் சுமக்கின்ற புத்தகத்துக் கட்டுக்கும்

      எழுதியபே ராசிரியர் எல்லார்க்கும் அடியேன்!

மனமுவந்து சொன்னாயே ‘இடியட்டு’ என்கின்ற

      வார்த்தைக்கும் அடியேன்; வாய்மலர்க்கும் அடியேன்!